Monday, October 23, 2006

عبد الحميد دراز .. أو نور الشريف


1


بدا نور الشريف لفتره طويله كأنه ليس له وجود .. لثلاث سنوات متتاليه كان يقدم أعمال تليفزيونيه هى أقرب لتسالى اللب و السودانى منها للفن .. بالرغم من إن أحدها - ( عيش أيامك ) - كان نابع من تجربه شخصيه للممثل و المؤلف على السواء .. إلا أن زخم تجربه منتصف العمر التى مرا بها لم يظهر لنا سوى بشكل منمط عن الرجل الكبير الذى يطارد نزوات شخصيه لم يمارسها طوال عمره

بأختصار رسم نور الشريف لنفسه صوره نجم لامع الوجه . يرتدى ثياب فاخره . و يصفف شعره بعنايه . لا ممثل يبحث عن ذاته فى دور ما

2
إذن .. ما الجديد الذى حدث آلان بالذات ؟ .. و أستدعى الحديث عن نور الشريف ؟
عارفين ايه اللى حصل .. نور إبتدى يعيد حساباته


3


بصراحه أنا ما كنتش متفائل .. لكن وجود أسم محمد جلال عبد القوى على المسلسل - ( حضرة المتهم أبى ) - كمؤلف , و أسم رباب حسين كمخرج منحني بعض التفائل
جلال عبد القوى القادم من المسرح .. و المهموم برصد تقلبات الواقع المصري المعاصر . المتكئ على قيم أخلاقيه و دينيه مستنيره و متفاعله مع الواقع
و رباب حسين .. التى أظهرت كرامات فى إداره الممثل و صنع هارمونى بين أفراد كتيبة الممثلين .. صاحبه صوره ثريه قل وجودها فى التليفزيون
ها .. ايه يا حاج نور ؟ .. ايه اللى دخلك مع العالم دى ؟ ما أنت كنت هادى و مطمن مع مصطفى محرم و الريس النقلى ؟

4

بعد أول حلقه لم أصدق نفسى .. فنور الشريف بأداء حيوى و نيولوك مختلف لمدرس ثانوى فاضل و مشاعر أصيله لأب يحاول النجاه بأبنائه من واقع شرس أستطاع بهدوء سحبى إلى منطقته .. ظبطت نفسى متلبسا بالحرص على موعد عرض المسلسل .. و لمست داخلى شغف حقيقى لمتابعه نور الشريف ..
فنور عبر اللعب على تنويعات مشاعر تخصه هو ذاته قبل أن تخص ( عبد الحميد دراز / الشخصيه ) .. يقدم صولوهات أداء أنصهرت فيها بساطه و تلقائيه و خبرة الممثل .. و الأيمان بمجموعه قيم تمثل نسق أخلاقى هو نغمه حاضره فى كتابات محمد جلال عبد القوى
بإختصار عاد أنبهارى القديم بممثل أحبه بشده أسمه نور الشريف .. ممثل مش نجم

5


شخصيه ( عبد الحميد دراز ) شخصيه مثاليه زياده عن اللزوم ؟؟؟؟؟

و من الذى قال أن مثاليه الشخصيه الدراميه لا تتيح للممثل تقديم أداء ممتع ؟
حقيقى أننا مللنا من مثالية سميره أحمد .. و ساندنا عبله كامل و سميه الخشاب فى أداء شخصيات لا يمكنها أدعاء المثاليه مثل شخصيتي ( ريا ) و ( سكينه ) .. لكن هذا لا يعنى أننا ضد الشخصيه المثاليه
من حق نور الشريف تقديم شخصيه مثاليه فى مسلسل .. إذا أستطاع فقط أن يمنحها واقعيه و حراره الأنسان

6
عن خيرى شلبى فى البورتريه الذى كتبه عن نور الشريف فى يوم من الأيام أنه ذكر بيت شعر قديم .. شبه فيه نور بأناء و شخصياته التى يؤديها بالخمر
يقول بيت الشعر
رق الإناء و راقت الخمر .. فتشابها و أختلط الأمر
فكأنما خمـــــــر و لا قدح .. و كأنما قـدح و لا خمر

1 comment:

nour said...

الحقيقة انا من الناس اللى بتحب نور الشريف جدا و ممكن تغفر له اى حاجة يعملها زى مآساة عيش ايامك و السبع بنات لأن نور الشريف كل ما يجى اسمه فى دماغى افتكر الفيلم الرائع ضربة شمس و افتكر ازاى انا بتنح قدامه كل ما يتعرض حتى لو شفته عشرين مرة فى اليوم..و الحقيقة انا مكنتش متوقعة ان المسلسل اللى بيعملع السنة دى حيكون بالشكل ده عن نفسى انا معجبة بالمسلسل بالرغم من بعض الاعتراضات زى زج احمد جلال عبد القوى ابن المؤلف ليكون بطل القصة و اللى بتدور حواليه كل الاحداث مع انه معرفش يقنعنى و لا يخلينى اتعاطف معاه بالعكس اتعاطفت مع محمد احمد ماهر و شريف سلامة اصحاب الاداء السهل الممتنع و طبعا زينة كانت مختلفة ..كان فيه بعض المبالغة لاداء دور الفلاحة اللى كلنا عارفين انها مبقتش موجودة فى العصر ده بس زى بعضه معالى زايد هى آمال زايد فى هذا المسلسل و يبقى الآداء الراقى لنور الشريف و الاستاذ استاذ برضه يعنى
دى اول زيارة للبلوج بتاعك يا باسم و اكيد مش حتكون الاخيرة:)